Categoría: Sen categorizar

A Rede Social Galicia Sur organiza o primeiro Círculo de Silencio en Vigo.

O 17 de outubro na Farola de Urzáiz coa rúa Príncipe, de 20:00 a 20:30h.

 

Nun mundo desbordado de ruídos, de sobreinformación que desinforma, de eslóganes e publicidade comercial e política,  o silencio ten un potencial revolucionario para reivindicar outros mundos posibles e necesarios.

Por iso  o 17 de outubro, Día Internacional para a Erradicación da Pobreza, eliximos o silencio en solidariedade coas persoas migrantes para denunciar as políticas española e europea nas nosas fronteiras.

O silencio como protesta. Como denuncia. Como acción.

Negámonos a permanecer indiferentes, negámonos a ser cómplices, negámonos a mirar cara outro lado.

Esiximos outras políticas, outras miradas, comprometidas coas persoas antes que cos capitais, cos dereitos antes que cos poderes, coa vida digna antes que coa represión xeneralizada.

Podes consultar aquí o manifesto.

Agardámoste o 17 de outubro!

 

Qué é un círculo de silencio?

 

Apoian:  Foro Galego de Inmigración, Coordinadora Galega de ONGD, Rede Galega de Persoas Refuxiadas, Asociación Faraxa, SOS Racismo Galicia, Taller de Solidaridad, Vigo, ACLAD Alborada, Cáritas Diocesana Tui-Vigo, Comité Oscar Romero, Entreculturas Vigo, Fundación Balms, Fundacion Proclade, Médicos do Mundo, Oxfam-Intermón, Parroquia Cristo de la Victoria, Solidariedade Internacional de Galicia, Asociación de mulleres DORNA, Irmandade Obreira Católica, Acción Verapaz, Movemento cidadán O noso barrio, Centro cultural Rueiro, Centro xuvenil Abertal

 

A Rede Social Galicia Sur continúa coa campaña que xa apoian máis de 500 sinaturas e 19 organizacións!

O 17 de outubro celébrase o Día Internacional para a Erradicación da Pobreza e, como todos os anos nesta data, organizacións de todo o mundo esixen aos gobernos que se comprometan a poñer en marcha medidas para acabar coa #desigualdadeobscena.

Queremos aproveitar o momento para continuar loitando por recuperar a #cooperación e incidir  sobre os orzamentos municipais para conseguir que se destinen os recursos necesarios para a erradicación da pobreza e da desigualdade. 

Vigo segue a ser unha das cidades de España, na súa franxa de poboación, que menos destina á axuda oficial aos países menos desenvolvidos que, ademais, nos dous últimos orzamentos municipais (2015 e 2016) deixou sen executar as partidas destinadas a proxectos no exterior.

No presente ano 2017, tras a posta en marcha desta campaña de incidencia no pasado mes maio e a menos de catro meses para rematar o ano, o Concello decidiu a última hora conceder 50.000 euros a dous proxectos de axuda humanitaria a Unicef e ACNUR.

En concreto, o Concello destinou 30.000 euros para o proxecto “Acceso ás necesidades básicas esenciais para a poboación desprazada interna en IRAK” de ACNUR e 20.000 euros ao proxecto “Acceso á educación en Siria – Aprender en medio da destrución” de UNICEF.

A medida pode parecer unha boa solución porque con estas cantidades complétase a execución do orzamento aprobado en 2017 para cooperación internacional, cubrindo así unha das demandas iniciais do noso manifesto.

Sen embargo, sen deixar de valorar positivamente estas aportacións, non podemos estar de acordo cunhas concesións realizadas a última hora a través de subvencións nominativas, sen convocatoria pública nin concorrencia competitiva e sen contar coa participación nin a opinión do Consello Municipal de Cooperación.

Vigo merece unha auténtica política pública sobre cooperación ao desenvolvemento. Unha política transparente, previsible, de calidade.

Unha política fundamental para loitar contra a pobreza e as desigualdades!

Apoia o “Manifesto por un Vigo comprometido coa cooperación internacional“. Máis de 500 persoas e 19 entidades xa o fan: 

Amigos da Terra, Cáritas Diocesana Tui-Vigo, Coordinadora Galega de ONGD, Comité Oscar Romero Vigo, ECOAR, Entreculturas Fe y Alegría, Emaús Fundación Social, Fasfi, Fundación Balms para a Infancia, Fundación Juan Soñador, Médicos do Mundo, Oxfam Intermón, Parroquia Cristo de la Victoria, PROCLADE, Semilla para el cambio, Solidariedade Internacional Galicia, REDES – Red Entidades para el Desarrollo Solidario, SOS Racismo Galicia e Taller de Solidaridad.

Apóianos. Defende a cooperación!

Se a vosa organización quere apoialo, envíanos un correo a info@redesocialgaliciasur.org explicando a decisión e inclúe o voso logo para integralo nas comunicacións.

Se es un particular, asina o manifesto en change.org.

Contamos con vos.

Os gobernos locais teñen unha responsabilidade esencial á hora de promover os dereitos humanos e o desenvolvemento dos pobos e cidades do Sur.

Neste tema, como noutros, o goberno municipal de Vigo non pode quedar atrás.

Sen embargo, nos últimos anos esqueceu a cooperación internacional, deixando sen executar os fondos destinados a proxectos no exterior en 2015, 2016 e parece que en 2017…

Logo da denuncia pública coa campaña #VigoNonCoopera , a #CooperaciónEsquecida do Concello de Vigo,  a Rede lanza agora o “Manifesto por un Vigo comprometido coa cooperación internacional“, un texto que resume o estado da cuestión e as nosas demandas. Un manifesto que vai asinado por 12 entidades:  

Amigos da Terra, Cáritas Diocesana Tui-Vigo, Coordinadora Galega de ONGD, Comité Oscar Romero Vigo, Entreculturas Fe y Alegría, Fundación Balms para la infancia, Oxfam Intermón, Parroquia Cristo de la Victoria Vigo, PROCLADE, Semilla para el cambio, Solidariedade Internacional Galicia e SOS Racismo Galicia.

Recuperemos a cooperación ao desenvolvemento como política pública fundamental para loitar contra a pobreza e as desigualdades!

Fomentemos unha cidadanía crítica, activa e solidaria na cidade de Vigo!

Apóianos. Defende a cooperación!

Se a vosa organización quere apoialo, envíanos un correo a info@redesocialgaliciasur.org explicando a decisión e inclúe o voso logo para integralo nas comunicacións.

Se es un particular, asina o manifesto en change.org.

Contamos con vos.

NOTA DE PRENSA DA REDE SOCIAL GALICIA SUR
DISPOSITIVO DE PRIMAVERA VS. CENTRO DE INCLUSIÓN SOCIAL
AS PERSOAS SEN FOGAR NON PODEMOS ESPERAR

A Rede Social Galicia Sur manifesta a súa inquietude polo incumprimento, una vez máis, dos prazos previstos para a apertura e posta en marcha do Centro de Inclusión Social para as Persoas Sen Fogar de Vigo. Facémonos eco da preocupación da cidadanía de Vigo e da dramática situación das personas que viven ou malviven nas rúas da nosa cidade.
A proposta orixinal de peche do Dispositivo de frío o pasado día quince de Marzo, e a súa apertura inmediata como Centro de Inclusión Social, non se fixo realidade ata o presente intre. Non temos, ademais, ningunha noticia ou información ó respecto por parte da Alcaldía.
É máis que evidente que os prazos das teóricas actuacións non se están a cumprir: As obras necesarias para acondicionar o edificio cara ó cumprimento dos requisitos esixidos pola Xunta de Galicia para a posta en marcha dun recurso deste tipo aínda non comenzaron, non se fixo a convocatoria pública para a xestión do Centro e non se sabe con certeza se existe unha partida orzamentaria suficiente para este tema.
Todo isto fainos temer polo futuro, non só dos vindeiros usuarios do Centro, senón polas persoas que están a usar na actualidade o Dispositivo de Frío (Primaveral); e polas consecuencias que o incumprimento do acordado polo Concello coa Fundación que cedeu o espazo poidan ter.
Instamos ós responsables da Alcaldía a dar reposta a esta falta de información, e a solucionar os problemas actuais que están a impedir que se cumpra coa vella promesa do Centro de Inclusión Social, máxime cando xa dispoñemos dun edificio axeitado dabondo para ese fin.
A Rede Social Galicia Sur segue agardando unha resposta por parte da Alcaldía ante a petición reiterada dunha entrevista sobre este tema.

A Rede Social Galicia Sur: ACLAD Alborada, Asoc. Érguete Vigo, Caritas Diocesanas de Tuy-Vigo, Comité Oscar Romero, Emaús Fundación Social, Entreculturas, Fundación Proclade, Grupo Autoapoio Imán Intermón Oxfam, Médicos do Mundo, Parroquia Stmo. Cristo da Victoria, Solidariedade Internacional, Organizacións e colectivos, sen vinculacións partidistas nen sindicais, que traballan no eido social e na cooperación internacional ao desenvolvemento co fin de acadar unha sociedade máis xusta, igualitaria, equitativa e sostible que respecte os dereitos das persoas,

A Rede Social Galicias Sur, convócate ao acto para reclamar a apertura do Centro de Inclusión Social Público na cidade de Vigo para as Persoas sen Fogar.

Esto xa foi aprobado en pleno Municipal do Concello de Vigo, e seguimos á espera tras seis anos.

QUE?

Acto para reclamar a necesidade de apertura dun centro de inclusión social público na cidade de Vigo para as Persoas sen Fogar.

ONDE?

Concentración diante do MARCO (rúa do Príncipe) para posteriormente marchar ata a praza da Constitución pola mesma rúa do Príncipe e cruzando a Porta do Sol.

CANDO?

Xoves, 15 de abril de 2010 ás 19:30 ,

QUE PODES FACER?

• Asistir ao acto
• Difundir esta convocatoria entre os teus contactos
• Imprimir o cartel e poñelo visible nos lugares que consideres.

Se algunha entidade quere adherirse envia email a  redesocialgaliciasur@yahoo.es

Dende a Rede queremos dar as gracias a todos e todas as que nos axudáchedes a construír a dobre cadea humana ao redor do edificio da GOTA DE LEITE como acto de reivindicación para a apertura inmediata do Centro de Inclusión Social e Albergue Público na cidade de Vigo.

A convocatoria foi un rotundo éxito contou coa participación de máis de 500 persoas que rodearon o edificio en sinal de apoio e reclamación firme da súa apertura e que participaron ademais no acto simbólico da súa inauguración celebrado na porta dunhas instalacións adicadas históricamente como centro de acollida.

Esta extraordinaria resposta ofrecida pola cidade para a posta en marcha do Albergue visibiliza con contudencia a necesidade deste recurso e o apoio rotundo á Xunta de Galicia para que axilize os trámites pertinentes para a súa apertura.

Recordemos a Rede atópase á espera de resposta por parte do Presidente da Xunta, a Conselleira de Traballo e Benestar, e a Delegada Territorial da Xunta en Vigo, sobre á reunión solicitada para abordar o estado do proxecto de apertura deste dispositivo con interese de colaborar e apoiar para que sexa XA unha realidade.

De novo, gracias a toda á cidadanía presente diante do Fogar San Paio “Gota de Leite” que sumaron a súas voces para dicir alto e claro

SOLUCIÓN XA PARA AS PERSOAS SEN FOGAR!

Achegamos ó manifesto que seu leu como clausura do acto así como fotos do mesmo. Se tes máis fotos escríbenos info (arroba) redesocialgaliciasur.org

Durante os últimos días diversas entidades estanse a sumar a reinvidicación da Rede pola apertura XA dun albergue público en Vigo.

Dende o Colexio de Educadoras e Educadores Sociais de Galicia queremos amosar o noso apoio á reivindicación formulada pola Rede Social Galicia Sur para a apertura, sen dilación, do Centro de Inclusión Social e Albergue Público de Vigo

A Fundación Aldaba como entidade sen ánimo de lucro que traballa cos colectivos vulnerables quere unirse solidariamente á convocatoria dos actos de apoio á apertura do albergue na cidade de Vigo

Desde la unidad de Tratamiento de Alcoholismo de vigo “ASVIDAL” queremos mostrar nuestro apoyo total a los actos convocados para solicitar la inmediata apertura del albergue público. ¡Ni un día más de espera! ¡Ni una muerte más!

A Asociaciación de Integración Galego-Brasileira apoia publicamete a apertura inmediata do albergue.

Tamén expresaron o seu apoio e o desexo de contar entre as organizacións que apoian a convocatoria:

• Foro Galego de Inmigración
• Asociación Plataforma polo Emprego

Se queres podes deixar un comentario nestra entrada sumándote a iniciativa

Tras os reiterados incumprimentos dos prazos establecidos para a apertura do Centro de Inclusión Social e Albergue Público que a Xunta de Galicia ten proxectado ubicar no antigo Fogar San Paio – “Gota de Leite” na cidade de Vigo, a Rede Social Galicia Sur convoca a cidadanía viguesa a participar na construcción da segunda Cadea Humana arredor deste emblemático edificio.

Mediante a formación desta cadea humana coa que pretendemos “abrazar” novamente o edificio da Gota de Leite reinvidicaremos de forma simbólica o apoio da cidade a este proxecto así como a reclamación da urxente necesidade da súa apertura, sen máis dilacións. Este proxecto xa é unha realidade. As obras de adaptación do edificio xa están rematadas. Non podemos nin vamos a renunciar á prestación dun servizo esencial na cidade de Vigo e necesario para o conxunto da súa cidadanía. Súmate á reinvidicación da súa apertura inmediata. Súmate a celebración simbólica da súa inauguación que se celebrará xunto a Cadea Humana o vindeiro Xoves, 21 de Maio de 2009, ás 20 Horas no edificio do Fogar San Paio- “Gota de Leite” (Ronda Don Bosco, 1. Ao lado do Concello).

Ademáis, o mércores 20 de maio ás 20 horas iniciarase unha sentada de 24 horas que arrancará coa “durmida” na porta do edificio e rematará coa Cadea Humana do xoves 21 ás 20 horas.

Se a vosa entidade, organización ou asociación desexa sumarse aos actos ou apoialos públicamente remitide un correo electrónico a info (arroba) redesocialgaliciasur.org. Se queres o cartaz en maior calidade para pegar no teu ámbito escríbenos.

A Rede Social Galicia Sur (RSGS) está formada por máis de 15 asociacións das areas de acción social e cooperación ao desenvolvemento de Vigo. A RSGS leva en activo varios anos, aumentando a súa presenza pública e consolidando as súas bases pouco a pouco.

Acadada certa notoriedade faise necesario establecer unha canle de comunicación directa coa sociedade e esperamos que este blog sirva para iso. Todavía nos queda un longo recorrido que facer, moitas cousas que mellorar do blog, da cidade, do mundo… pero por se algo nos caracterizamos tódos os activistas que formamos parte das asociacións que constituen a rede, é polo noso tesón e polo traballo constante.

Engade esta páxina os seus marcadores ou mellor todavía engada este feed ao seu lector de blogs, para manterse ao tanto das novedades.

Por último dicir, que tal vez engadamos novas máis antigas que esta data, para que quede constancia na web de accións pasadas, pero hoxe 13 de Maio do 2009 a bitacora da RSGS está no aire, e dara que falar…